ՀԱՅԱՍՏԱՆԻ ԼԻԶԻՆԳԱՏՈՒՆԵՐԻ ԱՍՈՑԻԱՑԻԱ

Կազմակերպության կառավարման մարմիններն են՝ ընդհանուր ժողովը և Կազմակերպության նախագահը։

ՀՀ Լիզինգատուների Ասոցիացիան հիմնադրվել է 2021 թվականի հուլիսի 8-ին իր վեց հիմնադիր անդամների որոշմամբ, իսկ պետական գրանցում է ստացել 2021թ սեպտեմբերի 27-ին։ Ասոցիացիան հանդիսանալով ՀՀ լիզինգի ոլորտի ներկայացուցիչը՝ նպատակ ունի համախմբել մի շարք բանկեր և վարկային կազմակերպություններ՝  նպաստելով ոլորտի բարեփոխումներին, օրենսդրական փոփոխություններին և լիզինգի գործիքի ճանաչելիության և իրազեկվածության բարձրացմանը:

Ներկայումս ՀՀ Լիզինգատուների Ասոցիացիան համալրված է թվով 15 անդամ ֆինանսական կառույցներով, որոնք իրենց անդամակցության շնորհիվ օգտվում են Ասոցիացիայի ստեղծած համագործակցության, փորձի փոխանակման և նախաձեռնությունների հնարավորություններից՝ շարունակաբար զարգանալով և ամրապնդելով իրենց դիրքերը լիզինգի շուկայում։

Մեր առաքելությունն է ապահովել հուսալիության բարձր մակարդակ, զարգացնել լիզինգային շուկան, լիզինգային գործիքի արդյունավետությունն ու հասանելիությունը, նպաստել լիզինգի ոլորտում օրենսդրական փոփոխություններին, աջակցել անդամ ֆինանսական կառույցներին, ընդլայնել կապերը ոլորտի միջազգային կառույցների հետ, բարձրացնել լիզինգի նկատմամբ իրազեկվածությունը և վստահությունը շուկայում։

Ասոցիացիայի հիմնական նպատակներն են՝

• Ներկայացնել, երաշխավորել և պաշտպանել Հայաստանի լիզինգատուների շահերը լիզինգին առնչվող ոլորտներում պետական քաղաքականություն մշակող, իրականացնող և այլ մարմիններում.
• Ստեղծել առավել բարենպաստ գործունեության միջավայր լիզինգային գործարքի բոլոր կողմերի համար, միասնական ձևակերպել խնդիրները և ձևավորել բոլոր շահառուների համար դրանց միասնական լուծման մոտեցումներն ու եղանակները.
• Բարձրացնել լիզինգի գործիքի վերաբերյալ ճանաչողությունը և իրազեկվածությունը, հետևել համաշխարհային շուկայում գործիքի զարգացման տենդենցներին և դրանք փոխանցել ու համապատասխանեցնել Հայաստանի շուկային.
• Նպաստել ՀՀ-ում Լիզինգի՝ որպես ՀՆԱ-ի (համախառն ներքին արդյունք) մակարդակի ավելացման վրա ազդող գործիքի, մի շարք հարկային արտոնությունների տրամադրմանը՝ դրանով իսկ խթանելով ՀՀ տնտեսության զարգացումը․
• Կազմակերպել թրեյնինգներ և ստեղծել միջազգային տենդենցներին համապատասխան նորագույն և Հայաստանում նորարար պրոդուկտներ․
• Իրականացնել պետական սուբսիդավորման ծրագրերի գծով անընդհատ բարելավումներ, հնարավորություն ստեղծել նոր ֆոնդերին և ծրագրերին միանալու համար․
• Լուսաբանել ոլորտը, նեղ մասնագիտական տեսանկյունից հավաքագրել և փոխանցել շուկայի վերլուծության համար անհրաժեշտ վիճակագրական տեղեկատվություն․
• Նպաստել միջազգային կազմակերպությունների կողմից Հայաստանի Հանրապետությունում լիզինգին առնչվող ծրագրերի իրականացմանը․
• Իրականացնել լիզինգային ոլորտի կանոնակարգման բարեփոխումներ, փոխգործակցել պետական մարմինների հետ․